Tante Johanna hie foldien oan de winsken fan dûmny van Gelder oangeande syn foargonger Gerardus Winsemius.
Tante wie noch lang net útpraet en skoanfaer hie syn nocht ek noch net.
It die wol bliken, dat Dominicus Gerardi in avontûrlik libben efter de rêch hie, Antien Schellings moat syn tredde frou west hawwe.
Oplaet as byldsniier, krige er letter yn Ljouwert in oaljemole en letter noch in sjippesiederij.
Syn lêste reis waerd ûndernommen út Warkum wei, dêr wenne alteast de widdou.
Tante fortelde noch, dat út it Dokkumer forhael op to meitsjen wie dat fan ,,over-over-grootvader" Douwe Jans, dy't nei't wy wisten acht soannen hie, ús nou fjouwer bikend binne: Dominicus (de jongste) en fierder Claes Douwes, Jan Douwes en Gerardus Douwes.
It wie tiid wurden en mei in ,,nacht allegearre" stieken ,,De Vrouwe Goed en Schoon" en ik ,,de Schooldienaar" op eigen hurd ta.
DE MOARD BY DE KOAIPLEATS
Gaest, 23 oktober 1752.
Fannacht waerd der by ús op it rút kloppe. ,,Master, binne jo wekker?
Der is in man formoarde!"
Mei dy tynge hellen Siebe Sytses, boerefeint by Anne Heeres to Gaest, Thomas
Ages en Tjeerd Murks fan Parregea, my út bêd.
Efter de âlde Koaipleats tusken Gaest en Ferwâlde hienen hja in dead lichem fan in man yn in sleat foun.
It die bliken, dat er deaslein wie mei in stôk of sa, hwant de holle wie him alhiel formoarzele.
De moardner(s) hie(nen) de man útklaeid en libben of dea yn 'e sleat smiten.
It doarp spjaltte der fan.
Hwat stakker soe dat wêze kinne en hwat minske kin soks dwaen.
Der kaem al gau folk op 'e lappen, guon koenen oanwizing dwaen oangeande de misdied.
Sa hie Jan Wiebes yn de iere sneintomoarn trije manlju fan it Warkumer beurtskip kommen sjoen, mei terskkneppels en oar ark by har.
Hwat letter yn 'e moarntiid hie de tolgaerder op it Blauhûs twa manlju, mei ark by har, trochlitten.
De iene hie in stûr tol bitelle.
Hja hawwe dêr yn 'e herberch oanstutsen.
It duorre dan ek net lang of men hie it spoar folgje kinnen oan Snits ta.